Hari Ibu

MENYAMBUT HARI IBU

 22 DESEMBER 2021

سڽق في تڠت نڠ في جيويه – إينوڠ ڬيڬيه جك موميتا

جك فوة رنوب جك فوة چمفلي – ميتا ڬولي بايم مولا 

چهوة اون موروڠ فوة اون موليڠ – فوما نڠيڠ بايم مودا

جك فوة اون كروت تهوق بوه فتيك – كا نتاريق بوڠوڠ كلا

ميتا اسم بوه سليميڠ – بوه كويون ريڠ بوه مي جوڬا

تما نفئيك لي اورومه – تئر ميه موه نچڠ لنجا

لهس ڽن نبوه لم بلاڠوڠ – نلاوق ڠن چمفلي سيرا

سي بله دافو نتاڬون بو – سي بله دافو ڬولي راوا

داڠ داڠ منن ما تماڬون – ڽق لم ايون فيكا جڬا

نچوق انق فوما سنداڠ – كا نتيمڠ ڽق بارونا

سيماڽق جك كو كو تيمڠ چيق – بوڠوڠ فتيك لهو سروڠكهي

بك تريب هوديب عقل ليسيق – جد كا چوليق بوڠوڠ اوكي

سيما ڽق جك كوتيمڠ فوه – بوه بك بوڠكوس بوڠوڠ رنتي

عه كا رايق كابج سوڠڬوه – لوم بك اوتوه كا موفندي

سيما يق  جك كوتيمڠ فوق – بوڠوڠ سلفوق توجوه تڠكى

هل مايق چوة عهكا رايق – كفوق سلفوق بوڠوڠ رنتى

لهس نتيمڠ نجوك بك كو – هوه هل تڠكو نفلالى

لن كمڠ جك اوبك دافو – لن فتهو بو تاڬون ڬولي

لن كمڠ چڠ ڠن كمامه – لن تيچه ڠن سيرا چمفلى

كو في ڬچوق بوڠوڠ فنجو – وية ووة جارو جي دودى

Sinyak pi teungeut Nang pi jiweh – inong gigeh jak mumita

Jak pot ranub jak pot campli – mita gule bayam mula

Shyot on murong pot on mulieng – Poma neungieng bayam muda

Jakpot on kruet thok boh putek – ka neutarek bungong kala

Mita asam boh seulimeng – boh kuyuen reng bohme juga

Teuma neu peuekle u rumoh – taeu mehmoh neucang lanja

Lheueh nyan neuboeh lam beulangong – neulawok ngon campli sira

Siblah dapu neutaguen bu – siblah dapu gule rawa

Dang dang meunan Ma teumaguen – Nyak lam ayoen pika jaga

Neucok aneuk Poma sandang – ka neutimang Nyak baro na

Simanyak jak kutimang cek – bungong putek lhee sirungkhe

Bak treb  hudep akai lisek -  jeuet kaculek bungong uke

Simanyak jak kutimang poeh – boh bak bungkoih bungong rante

‘Ohka rayek kabeuet sunggoh – lom bak utoeh ka meupande

Simanyak jak kutimang poek –bungong seulapoek tujoh tangke

Hai Manyak cut ‘ohka rayek – kapok seulapoek bungong rante

Lheueh neutimang neujok bak KU – h’oh hai Teungku neupeulale

Lon keumeung jak ubak dapu – lon peutho bu taguen gule

Lon keumeung cang ngon keumamah – lon ticah ngon sira campli

KU pi geucok bungong panjoe – w’et w’ot jaroe ji meudodi

عه بن نچوق نفراتيب – كا جي ديب ديب بوڠوڠ ڬتي

لاله الا الله – محمد شاه ينك نبي 

 ينك أنق يڠ سمبه توهن – جيبج قروئن سرتا قاري

تمت قرئن جيبج نحو – جك بك تڠكو هنتوم خالي

لهه ڽن منهاج  تما إقناع – لوم جي سيماق كتاب بكري

عه تمت ڽن تما تحفه – تما عقيداه إيمن سنتوسي

لهه ڽن إحيا تما تصوف – بج بك سوڠڬوه حديث بخاري

لا له الا الله   -   محمد أفضال النبي

ڽنك أنق عمور فنجڠ  - جف ساواڠ ڬائنتت رزقي

لوم ڠن ليسيق عقل سهدا  -  لوم جي فوبلا ڬوب مفاكي

سو مدعوا دوم حكوم  -  ڬوب بندوم هن جيتهوك هاتي

جي حكوم ڬوب بن  يڠ علمي  -  هن مسيلي بن بوت نبي

لا له الا الله  -  محمد خاتم النبى

ڽنك أنق يڠ صاليح تهت  -  دوم جي فوبج علمي نبي

أرتا جيلا لوم تهت موراه  -  جي سمبه الله هنتم خالي

لوم ڠن هاتى هنتم سوسه  -  جي هداف الله فتڠ فاڬي

لوم ڠن تڬا هنتم ساكيت  -  بركت سائيد إبن جوزي

‘Ohban neucok neu peurateb – kaji deb deb bungong geutoe

Lailaha illallah  -  Muhammad Syah nyankeu Nabi

Nyankeu aneuk nyang seumah Tuhan – jibeuet Quru’an seureuta qari

Tamat Quru’an jibeuet Nah’u – jak bak Teungku hantom khali

Lheueh nyan Minhoj teuma Iqnak – lom jisimak kitab Bakeury

‘Oh tamat nyan teuma Tuhfah – teuma ‘Aqidah Iman seuntausi

Lheueh nyan Ihya teuma Tasawoh – beuet bak sunggoh Hadih  Bukhari

Lailaha illallah  -  Muhammad afdlalun Nabi

Nyankeu aneuk umu panyang – jeuep sawang geuintat raseuki

Lom ngon lisek akai sahda  -  lom ji publa gob mupake

Soe meudawa dum jihukom  -  gob bandum han jithok hate

Ji hukom gob ban nyang ‘ileumei  -  han meusilee ban buet Nabi

Lailaha illallah  -  Muhammad Khataman Nabi

Nyankeu aneuk nyang saleh that  -  dum ji peubeuet ‘ileumei Nabi

Areuta ji le lom that murah  -  ji seumah Allah hantom khali

Lom ngon hate hantom susah – ji hadap Allah peutang pagi 

Lom ngon teuga hantom saket  -  beureukat Sayed Ibnu Jauzi

تمر نچوق جك ڤلالى – كا نمى٢ أوليه مها

مها مي جف٢ جوروڠ – جف٢ ڬمڤوڠ كا نبابا

عوه تريب تما سيڽق جيموۑ – كا نفواي نجوك بك ما

نيور بري ديق ديلو باچوة – سماڽق چوة كالافر دهڬا

ڤوما بري ديق ريجڠ ريجڠ – سيڽق بنتڠ لايو متا

ڤوما فئيس دالم أيون – كا نفنتون لي ندودا

جك كوتيمڠ لينتو بارو – جك كودو٢ بوه هاتي ما

جك كودودي سيڽق صوفي – جك كودودي چوة بنتا ما

جك كودو٢ ڤو سملاكي – تائيس كدري چوة فڠليما

جك كدودو٢ سيڽق علي – جك كودودي بنتا راما

جك كودودي دارا بارو – جك كودودو أيم متاما

جك كودودو فتري ديوي – جك كودودي فتري دارا ما

جك كودو٢ فو سمبينى – تائيس كدري بوه هاتي ما

جك كودو٢ فوچوة سيتى – جك كودودي بيجيه متاما

عه كا رايق كابج سوڠڬوه – لوم بك اوتوه كا موفندي

سيما يق  جك كوتيمڠ فوق – بوڠوڠ سلفوق توجوه تڠكى

هل مايق چوة عهكا رايق – كفوق سلفوق بوڠوڠ رنتى

لهس نتيمڠ نجوك بك كو – هوه هل تڠكو نفلالى

لن كمڠ جك اوبك دافو – لن فتهو بو تاڬون ڬولي

لن كمڠ چڠ ڠن كمامه – لن تيچه ڠن سيرا چمفلى

كو في ڬچوق بوڠوڠ فنجو – وية ووة جارو جي دودى

رايق باچوت هن تهت چابق – رايق سيتك ماكين ڬورا

ماكين موموت موت مڬروموت – تئر وية وة ماكين ڬورا

تئر جيعوي كديه كنو – ڤولا ڤولو ويه واو بكما

جيعوي كنو جيعوي كديه – ستوت بينتيه كا جي لتا

ڤوي متمڠ هابيه جيچوكق – ڤوي مرومڤوق دوم جي هيلا

هنا ساڤوي جد مديڠ – سوترا بنڠ تيق لم جيأ

عه تلاكي هن جيتيم بري – جيمو سابي عه تاهيلا

تئر جيعوي ربه ربوه – جيچوق بولوه جي عوة سوترا

تتاڬون بو جيچوق أڤوي – دوق لم رلول جي مچوچا

تامراوي جيچوق لولون – بوه لم أيون جيڤله إيجا

تاسماريڠ جئچوق إيرن – تاڤوق تفن ئيك چوڠ ڤسا

باچوت سيلب جيچوق چدوه – كا جي دابوه أوبك روڠ ما

ڤدوق چدوه جيچوق چاكر – هن تاتوبن كيلت فجا 

جيچوق تورق جيعة بنڠ – هنئيك لينتڠ نڠ ڠن مها

ڤدوق لم لموڠ جيتمڤا بك ميڠ – جي تمي تريڠ جي سڤوة موكا 

جي تمي توڠو سمڤوم دأولو – جئ تمي باتو جيروم بك دادا

Alih aksara:

Teuma neucok jak peulale – ka neumeme uleh Maha

Maha meme jeuep2 jurong – jeuep2 gampong ka neubaba

‘Oh treb teuma Sinyak jimoe – ka neupeuwoe neujok bak Ma

Neuyue bri dek dilee bacut – Simanyak cut ka lapar dahga

Poma bri dek rijang-rijang – Sinyak bintang layee mata

Poma peu-eh dalam ayon – kaneu  pantoenle neudoda

Jak kutimang Lintobaro – jak kudo-do boh hate Ma

Jak kudodi Sinyak Sufi – jak kudodi Cut Banta Ma

Jak kudodo posamlakoe – taeh keudroe Cut Panglima

Jak kudodo Sinyak  Ali – jak kudodi Bentara Ma

Jak kudodi Darabaro – jak kudodo ayeuem mata Ma

Jak kudodo Putroe Diwi – jak kudodi putroe dara Ma

Jak kudodo posambinoe – taeh keudroe boh hate Ma

Jak kudodo Pocut Siti – jak  kudodi  bijeh mata Ma

  

Rayek bacut han that cabak – rayek sitak maken gura

Maken meumot mot meugeurumot – taeu w’et w’ot maken gura

Taeu ji’eue keudeh keunoe – pula puloe wehwoe bak Ma

Ji’eue keunoe ji’eue keudeh – seutot binteh ka jilata

Peue meuteumeung habeh jicok – peue meureumpok dum jihila

Hana sapeue jeuet meudiyeueng – sutra beuneung tiek lan ji-a

‘Oh talakee han jitem bri – jimoe sabe ‘oh tahila

Taeu ji’eue reubah reuboeh – jicok buloh ji’uet sutra

Ta taguen bu jicok apui – duek lam reului ji meucuca

Ta meurawe jicok luloen – boeh lam ayoen jiplah ija

Ta seumareng jicok iruen – tapok teupeuen ek cong peusa

Bacut silab jicok ceudoeh – ka jidaboeh ubak rueng Ma

Peuduek ceudoeh jicok cakran – han tatuban ban kilat faja

Jicok turak ji’et beuneueng – han ek linteueng Nang ngon Maha

Peuduek lam lumueng ji tampa bam mieng – ji teumei trieng ji seupot muka

Ji teumei tungoe seumpom diulee – ji teumei batee jirom bak dada

Bale Tambeh, 17 Molod Teulot 1443 atawa  17 Jumadil Awal 1443 H bersamaan  22 Desember 2021 M, poh 09.44 wib.

( T.A. Sakti )