Matee Anggaran

MATE  ANGGARAN

 

Kayem that rakyat hansep anggaran

Wab peundapatan seuimbang hana

Peureulee saboh meuteumei sikhan

Sabe  lam utang udep lam donya

Udep lagee nyan hansep anggaran

Ka maklum taulan geutanyoe dumna

Jareueng dirakyat mate anggaran

Dirakyat  awam carong pihana

Nyang leupah gura haba lam koran

Mate anggran kayem lon baca

Peng le meutamon geupakek hanjan

Leupah that sayang nyan APBA

Nyang jeuet keu hireuen geutanyoe rakan

Sabab nyang pawang ureueng le nama

Pangkat pi rayek  carong lam awan

Pakri jeuet meunan buet sia-sia

Dalam jabatan kana wewenang

Kuwat  pikeran politek teuga

Tapi ‘antanjo ek jeuet lagee nyan

Ban rakyat awam  hansep keunira

Teusia rakyat geupileh gobnyan

Jeuet keu pimpinan watee PILKADA

Meunancit nyang jeuet anggauta Dewan

 Rugoe hanaban hana seutia

Padum thon dilee nyang geusalahkan

Bak sah anggaran teulat lagoi na

Peng bak ujong thon geupakek hanjan

SILPA  Triliyunan hanale guna

Meunye anggran teulat geusahkan

Geupakek hanjan thon baro teuka

Maka nyan geukheun mate anggaran

Ka lagee timphan meutindeh kerja

Meunyo cit watee nyang jeuet halangan

Pakon han panyang bak geuboh jangka

Sithon siteungoh watee beupanyang

OTSUS na jalan pakat Jakarta

Jinoe anggaran rijang geusahkan

Tapi hai rakan ujong jih sama

Teutap ujong thon riyoh anggaran

Sabe meuriwang “peunyaket” lama

Hantroh teupike bak  kamoe  awam

Pakon anggaran han habeh teuma (?)

Nacit nyang peugahle rakan-rakan

Sabab  jeuet meunan wabna KPK

Salah ngon silap bak ngui anggaran

Hana soe tujan katrok KPK

Aleh cit beutoi peuneugah meunan

Treb hana soe trang meuraba-raba

Sang hana keunong bingong lontuwan

Meuprom lam badan padum trep  lama

Dudoe lon pike bek sabe meunan

Tanyong bak rakan dum ahli nyang na

Baro lon teupeue le that piasan

Meumacam ragam alasan jihna

Cit gohlom  beutoi  pikeran awam

Takot jitawan uleh KPK

Meunyo tan keu lon  keu kah  pih bah tan

Meunan  tamselan  saboh umpama

Sinan keuh punca le  buet han jalan

Gampong  deungon  blang tinggai meurana

Akibat nyang brat tanggong lagee nyan

Meuthon-thon meunan bidang budaya

Hantom meureumpok dana nyang simban

Bukonle sayang seuniman nyang na

Laen lom teuma han paih aturan

Sabab hai rakan Qanun gohlom na

Na cit han jilop lam undang-undang

Peng nyang meukuyan han jeuet peuguna

Ladom reuncana nyang hana jalan

Bak po piasan siap geuh hana

Tinggailah Silpa meujuta kuyan

Jiwoe bak Mawang keudeh Jakarta

Watee Pemilu karu hana ban

Demi berjuang akan rakyatnya

Watee na pangkat meuteuingat tan

Allah E Tuhan rakyat nyan kada

Meunyo di Aceh saheh tatuban

Ujong thon rakan le tinggai SILPA

Nyang keujeuet Aceh gasien gob peunan

Peng dalam reugam tansoe peuguna

Cit mantong watee lam thon anggaran

Teuma  hai rakan cuttek lagoina

Buet ka meudhab-dhab pane lom  reumbang

Leupah that sayang  rakyat tan laba

Maka dum proyek di gampong di blang

Kota ngon peukan le nyang  tertunda

Sayang that rakyat geupreh bantangan

Sapeue picit tan geuteumei rasa

Digob di ateueh nyang mat pimpinan

Baluem ka keumang tamong beulanja

Honor insentif atau peng sidang

Bit  leupah le nan dana cit kana

Wahe peumimpin ureueng pilihan

Bekle anggaran mate kutika

Ramphak-sipakat  Eksekutif - Dewan

Get neu peutimang Aceh mulia!!!

*Tambeh:

 - SILPA =  Sisa Lebih Pembiayaan Anggaran

- KPK = Komisi Pemberantasan Korupsi

OTSUS =  Otonomi  Khusus

T.A. Sakti

Peminat sastra Aceh

Bale Tambeh, 31-12-2021 poh 10.10  wib.